Yn dilyn proses gaffael helaeth a thrwyadl, mae Freedom Leisure, un o brif ymddiriedolaethau hamdden nid-er-elw elusennol y DU, yn falch iawn o gyhoeddi ei fod wedi derbyn y contract i redeg y cyfleusterau chwaraeon a hamdden ym Mharc Chwaraeon Bae Abertawe (SBSP) gan Brifysgol Abertawe a Chyngor Abertawe.
Bydd y cytundeb yn cael ei oruchwylio gan Barc Chwaraeon Bae Abertawe Cyf, cwmni menter ar y cyd nid-er-elw, sy'n eiddo llwyr i'r Cyngor a'r Brifysgol, sydd wedi'i sefydlu i arwain datblygiad strategol y safle yn y dyfodol ac sy'n adeiladu ar gyfnod llwyddiannus o 25 mlynedd o gydweithio ers sefydlu Pwll Cenedlaethol Cymru.
Rydym yn falch iawn o fod wedi cael ein dewis fel gweithredwr newydd Parc Chwaraeon Bae Abertawe ac yn falch o fod yn bartner â Phrifysgol Abertawe a Chyngor Abertawe ar y fenter hon. Mae hwn yn gyfle cyffrous i gefnogi cyfleuster sy'n chwarae rhan mor bwysig mewn lles cymunedol, bywyd myfyrwyr a chwaraeon perfformiad. Ar ôl rhedeg canolfannau hamdden ledled Abertawe yn llwyddiannus dros y saith mlynedd diwethaf, mae gennym eisoes ddealltwriaeth gref o'r gymuned leol a'i hanghenion, a fydd yn dod â manteision clir i'r bartneriaeth hon o'r diwrnod cyntaf. Edrychwn ymlaen at weithio gyda phartneriaid i ddatblygu'r safle ymhellach, gwella profiad y cwsmer a chyfrannu at y weledigaeth hirdymor ar gyfer chwaraeon, iechyd ac arloesedd yn y rhanbarth.
Ivan Horsfall Turner
Mae'r bartneriaeth, a fydd yn dechrau ar 1 Awst 2026, yn elfen allweddol o fodel gweithredu hirdymor newydd ar gyfer Parc Chwaraeon Bae Abertawe sydd wedi'i ddatblygu i wella profiad y cwsmer, gwella perfformiad a chreu sylfaen ar gyfer buddsoddi a datblygu'r cyfleusterau yn y dyfodol. Gyda'i gilydd, bydd y partneriaid yn adeiladu ar enw da Parc Chwaraeon Bae Abertawe fel canolfan ffyniannus ar gyfer chwaraeon perfformiad, gweithgarwch myfyrwyr a lles cymunedol.
Mae'r bartneriaeth hon yn gam cadarnhaol ymlaen i Barc Chwaraeon Bae Abertawe ac mae'n adlewyrchu ein huchelgais a rennir gyda Chyngor Abertawe i sicrhau ei ddyfodol hirdymor. Trwy weithio gyda Freedom Leisure, rydym yn gwella'r profiad i gwsmeriaid, wrth greu sylfaen gadarn ar gyfer buddsoddiad yn y dyfodol, gan gynnwys cyfleoedd sy'n gysylltiedig â'r Sefydliad Cenedlaethol Chwaraeon ac Iechyd. Edrychwn ymlaen at barhau â'n partneriaeth â'r Cyngor i ddatblygu cyfleusterau hygyrch o ansawdd uchel i'n myfyrwyr a'r gymuned ehangach.
Niamh Lamond
Bydd Freedom Leisure yn gweithredu'r holl gyfleusterau allweddol ar draws y parc, gan gynnwys canolfan chwaraeon a chaeau Prifysgol Abertawe, Pwll Cenedlaethol Cymru, Canolfan Athletau a Hoci, caeau chwarae'r Brenin Siôr V yn Ashleigh Road yn ogystal â'r cyfleusterau hamdden ar Gampws Bae y Brifysgol.
Gyda Freedom Leisure fel gweithredwr Parc Chwaraeon Bae Abertawe, byddwn yn gweithio gyda nhw, partneriaid a'r rhai sy'n defnyddio'r parc ar drefniadau cynaliadwy newydd er budd cymunedau, myfyrwyr y brifysgol a'r ddinas gyfan. Bydd y model gweithredu sengl newydd hwn ar gyfer y cyfleusterau yn ein helpu i wella'r safle a sicrhau ei fod yn cael ei redeg yn effeithlon. Mae Abertawe yn ddinas chwaraeon ac rydym am sicrhau bod cyfleusterau cymunedol yn parhau i fod ar gael i bawb - ac yn cael eu rhedeg i'r safonau uchaf posibl.
Tracey McNulty